Nuus

Kom lag lekker saam by Toyota Innibos 2025’n Fees vir jou lagspiere! By Toyota Innibos 2025 gaan dit oor een ding: LEKKER saam feesvier – en LEKKER saam lag! Die 21ste verjaarsdag van hierdie geliefde kultuurfees val saam met Afrikaans se eeufeesvieringe, en dis juis hoekom die program vanjaar propvol kwaliteit komedie is. Dis ’n tyd om te ontspan, die bolla los te maak en jou lagspiere behoorlik aan die werk te sit. En waar beter om dit te doen as in een van die vele teaters waar die land se beste akteurs en regisseurs jou kom vermaak? “Geagte Kampeerders” een van die feesdebute, is geskryf en aangebied deur Wynand van Vollenstee, met Thiart Li aan sy sy. ‘n Opsigter, eienaar en bestuurder van Willewaters Kampeerterrein verwelkom elke Desember die Transvalers met ope arms, tot ’n rampspoedige wending alles op hol jaag. Nóg ‘n debuut, “Kry vir jou ’n tux, Thomas”, bring groot name soos Dean-John Smith en Marion Holm na die verhoog. Tessa Slabbert weier om haar eksman se sogenaamde “toekenning” te aanvaar as ’n afskeidsgroet. Thomas moet haar oorreed om die funksie by te woon, wat lei tot ’n onwaarskynlike ooreenkoms vol emosie, lag en konfrontasie.  Vir diegene wat hou van gevestigde gunstelinge is daar ook klassieke komedies wat terugkeer na die planke, elk met ’n vars aanslag en geliefde akteurs. “Ouma is op pad” bring weer die immergewilde Dolla, vertolk deur Margit Meyer-Rödenbeck, terug op die verhoog. Hierdie stuk is ’n reis vol hart, wysheid en die soort wyshede wat net ’n ouma kan kwytraak. Dan is daar ook die immer gewilde “Moord met ’n T”, met drie legendes: Tobie Cronjé, Ignatius van Heerden en André Lotter, wat die verhoog aan die brand speel.  “Marion Monroe” is ’n eerlike en heerlike komedie waarin Marion Holm met humor en styl vra: wat maak jou, jy? En, “Vlerksleep” is ’n skreeusnaakse komedie oor die chaos en komedie van blinde afsprake, met ’n sterbelaaide rolverdeling en ’n vars kyk op liefdesvermaak, geskryf deur Peter Quilter, en in Afrikaans vertaal deur Frans Swart met Bertha le Roux-Wahl, David James, Elma Potgieter, Richard van der Westhuizen. Met hierdie ongelooflike keuse van produksies is dit duidelik: Toyota Innibos 2025 is ’n fees waar jy jouself kan verloor in stories, lag tot jou kake seer is, en weer met nuwe energie huis toe gaan. Kom sit terug, kom ontspan, en kom beleef wat Afrikaanse komedie alles kan wees. Jou sitplek wag – en jou lagspiere ook! Kaartjies beskikbaar by Ticketpro. Volledige program beskikbaar op www.innibos.co.za op Facebook, Instagram en TikTok.

KUNS GROEPUITSTALLING: Tuiskoms/Homecoming Opening: Dinsdag 2 Julie 2025 om 18:00 der LUR L Mabuza Galery-ure: Daagliks tussen 10:00 en 17:00 Begeleide Rondleiding: 12:00 en 15:00 daagliks Venue: Innibos Kunsgalery by die  Bergvlam Hoërskool Restaurant Deelnemende kunstenaars: Reuben Mpangane, Erica Schoeman, Odette Saayman, Mariana Zwaan-de Bruin, Winston Thekiso, Bob Mnisi, Ingrid Uys, Wendy Sippel, Lisa Tristram, Annalie Odendaal, Wendy Malan, John-Anthony Boerma, Leigh Voigt, Matthew Koster, Michael Selekane, Maria Pienaar, Cyril Chiburre Kurator: Dana MacFarlane Innibos bied met trots ’n groepsuitstalling aan wat kunstenaars ten toon stel wie se artistieke talent geïnspireer is deur die diverse en unieke natuurskoon van die Laeveld en Mpumalanga. Die Laeveld word allerweë  beskou as ’n streek met ’n ryk biodiversiteit, en die omgewing se energie en lig, sowel as sy ryk plant- en dierelewe, inspireer kunstenaars al eeue lank. Daarbenewens bied die kulturele diversiteit van die omgewing ’n artistieke platform waarbinne  ’n wye reeks sosiale dinamika verken kan word. Hierdie uitstalling verken spesifiek hoe die Laeveld die werk van kunstenaars beïnvloed het – dié wat hier woon, sowel as dié wat tyd hier spandeer het en nou elders woon, maar steeds hul ervarings en die omgewing se invloed in hul kreatiewe uitdrukking  vergestalt. Ons kyk spesifiek na kunstenaars uit ons artistieke diaspora, wat nou regoor Suid-Afrika en selfs oorsee hul merk maak. Ons sluit ook die minder bekende kunstenaars in, wat al lank in die gebied gewortel is en deel vorm van ons ryk artistieke erfenis. Hierdie veelvlakkige uitstalling bied werk in groot- tot kleinskaalse formaat, in ’n verskeidenheid mediums, insluitend skilderkuns, beeldhouwerk en keramiek. ’n Paar werke deur die feeskunstenaar Reuben Mpangane sal ook vertoon word. Die uitstalling sal op 2 Julie geopen word deur Me L Mabuza,  LUR van die Mpumalanga Departement van Kultuur, Sport en Ontspanning.

Innibos Laeveld Nasionale Kunstefees kondig nuwe hoofborg aan Die Innibos Laeveld Nasionale Kunstefees is trots om Toyota Suid-Afrika as nuwe hoofborg aan te kondig. Hierdie vennootskap is meer as net ‘n samewerking – dit is ‘n samesmelting van gedeelde waardes, ‘n passie vir kultuur en ‘n liefde vir lekker dinge. Toyota staan vir betroubaarheid, deursettingsvermoë en ‘n toekomsgerigte benadering – waardes wat hand-aan-hand loop met Innibos se strewe om kuns en kultuur te bevorder. “Toyota Suid-Afrika se betrokkenheid by Innibos is ‘n bewys van hul verbintenis tot die mense van hierdie land en hul kultuur,” sê Andy Lubbe, direkteur en feesbestuurder van Innibos. “Hulle verstaan dat ‘n familiefees soos hierdie nie net oor vermaak gaan nie, maar oor ‘n gevoel van gemeenskap, ‘n tuiste vir die kunste en ‘n plek waar herinneringe gebou word.” Innibos was nog nooit vir sy mense net nóg ‘n fees nie – dis ‘n viering van wat dit beteken om die lekker van die lewe te beleef. Dis musiek, kuns, boeke, teater, stalletjies, en vermaak vir oud en jonk.  Innibos se tema dié jaar is “LEKKER” want, dis is ‘n fees vir lekker mense, en lekker mense hou van lekker dinge…soos ‘n goeie voertuig. Dit maak Toyota en Innibos natuurlike pasmaats. Toyota se betrokkenheid by ‘n fees soos Innibos kom nie as ‘n verrassing nie. Hul handelsmerk resoneer met mense wat hou van avontuur, kwaliteit en standvastigheid. Mnr Leon Theron, Senior Vise-president  Bemarking by Toyota  Suid Aftika sê,  “Met ’n trotse erfenis van meer as 60 jaar in Suid-Afrika, het Toyota ’n integrale deel van vele gesinne se reis geword. As ’n familiegerigte handelsmerk is ons opgewonde om die hoofborg van die Innibos Laeveld Nasionale Kunstefees te wees. Deur Innibos te ondersteun, wil ons ’n  betekenisvolle bydrae lewer tot die kulturele lewenskrag en ekonomiese vooruitgang van die Laeveld. Net soos Innibos, verstaan en waardeer ons die krag van gemeenskap en die blywende impak daarvan. Ons sien uit daarna om hierdie jaar lekker saam met feesgangers te kuier en fees te vier!” Innibos is ‘n belangrike ekonomiese dryfkrag vir die Laeveld en omliggende gebiede. Die fees bring nie net kunstenaars en feesgangers bymekaar nie, maar ook entrepreneurs, plaaslike besighede en toerisme met ’n jaarlikse ekonomiese impak van bykans 80 miljoen Rand op die plaaslike ekonomie.  Innibos glo in die bou van sterk verhoudings met sy belanghebbendes en vennote. “Elke borg is vir ons baie belangrik. Ons verstaan dat ‘n fees van hierdie omvang net moontlik is met die ondersteuning van maatskappye wat glo in wat ons doen,” sê Lubbe. “Toyota is een van daardie maatskappye, en ons sien uit daarna om saam ‘n fees aan te bied wat ons kulturele rykdom vier.” Met hierdie vennootskap word een ding duidelik: Dis nie net ‘n bakkie nie, dis ‘n Hilux. Dis nie net ‘n fees nie, dis Innibos!

ʼn LEKKER produksieprogram nou beskikbaar – Kaartjieverkope open 28 April! Die Innibos Laeveld Nasionale Kunstefees keer terug na Mbombela van 3 – 6 Julie 2025 en hierdie jaar beloof dit om groter, ryker en LEKKerder as ooit te wees! Vir vier dae word die Laeveld ʼn bruisende sentrum van musiek, drama, komedie en kultuur – ʼn fees waar harte lag, trane rol en stories gedeel word. “Die Produksieprogram is nou beskikbaar op Innibos se webwerf, so maak gereed, dat as kaartjieverkope open op 28 April, jy so reg soos reën is om kaartjies te bespreek,” sê Philna Scholtz, die fees se programbestuurder. Toneelstukke wat harte gaan raak Van kragtige dramas tot lagwekkende komedies, Innibos 2025 bied ʼn verhoogprogram propvol talent en treffende produksies. “Speelgoed van Glas”, ʼn nuwe vertaling van Tennessee Williams se The Glass Menagerie, beloof om gehore te roer met sy fyn verweefde temas van verlange, liefde en verlies. Met ʼn sterbelaaide rolverdeling, insluitend Anna-Mart van der Merwe en Carla Smith, en bekroon by Woordtrofees vir Beste Toneelstuk, is hierdie produksie ʼn móét-sien. “Op die ligter noot bring “Kry vir jou ’n tux, Thomas”, ʼn spiksplinternuwe komedie, ʼn komiese én hartroerende verhaal na die verhoog, met Marion Holm en Dean-John Smith wat vir hope gelag, nostalgie én trane gaan sorg,” sê sy. “Vir diegene wat hou van ʼn verhaal met historiese en persoonlike diepte, bied “Seun”, gebaseer op Dana Snyman se ervarings, ʼn introspektiewe reis deur die 1980’s en die vrae wat daardie era ontlok het Komedie wat die lagspiere gaan toets Kampavonture loop heel dik in die humoristiese “Geagte Kampeerders”, waarin Wynand van Vollenstee ʼn tipiese Desember-kamp op ’n komiese wyse tot lewe bring. “Moord met ’n T”, met die immergewilde Tobie Cronje, bied ʼn moordraaisel met hope humor – en ʼn tikkie spanning! Philna brei ook uit op ander tonele. “Vir dié wat ʼn eg Suid-Afrikaanse karakter wil beleef: “Ouma is op pad”, met Margit Meyer-Rödenbeck, beloof ʼn humoristiese blik op hoe ʼn boervrou haar plek in ʼn moderne wêreld moet vind.” Musiek wat die siel voed Sy sê musiek bly ʼn onmisbare deel van die ervaring. “Hierdie jaar bring die fees ʼn pragtige sameloop van klassieke en kontemporêre musiek. “Opera-Tango”, met die betowerende Zanne Stapelberg en Albie van Schalkwyk, neem gehore op ʼn reis van vurige Spaanse Zarzuela’s tot klassieke operaklanke.” “Vir ʼn nostalgiese viering van Afrikaanse musiek, eer “Gé Sing – Hoor my lied” die ikoniese Gé Korsten, met kunstenaars soos André Schwartz en Louis Loock wat sy tydlose treffers in ʼn nuwe lig bring. En natuurlik, vir die manne wat hou van ʼn bietjie rock en roll: “Die beste band in die wêreld ooit, ek sweer!”, waar Ricus de Beer en Ryno Velvet sorg vir ʼn jol soos geen ander nie!” Kaartjieverkope open op 28 April! Maak seker jou kalender is gemerk, want kaartjies is te koop vanaf 28 April 2025! Met produksies wat reeds uitverkoop was by vorige feeste, moet jy vinnig spring om jou plek te verseker. Innibos 2025 is ʼn viering van storievertelling in al sy vorme – musiek, drama, komedie en kultuur – en ʼn geleentheid om jou siel te voed en jou lagspiere te oefen. Berei jou voor vir ʼn kunsfees wat jou hart gaan raak, jou verbeelding gaan prikkel en jou deel gaan maak van iets besonders.

Laat waai met lekker klanke in die Everest Wealth Wingerd Kuiertuin – een van vier kuierverhoë op die feesterrein Behalwe vir al die lekkernisse op die feesterrein en die skouspelagtige konserte op die Toyota-Hoofverhoog, wag daar nog ’n magdom ander ervarings en intieme musiekmomente op jou by Innibos – en ingesluit by jou kaartjieprys, kan jy ’n rits ander kunstenaars en gebeurtenisse ervaar, gratis en verniet! Van diep lirieke tot vrolike kuiermusiek, spog Innibos met vier unieke kuierverhoë, elk met sy eie atmosfeer en karakter. Een van die gewildste kuierplekke is die Everest Wealth Wingerd Kuiertuin. Innibos se Everest Wealth Wingerd Kuiertuin is die perfekte kuierplek vir moeë bene en vrolike harte –  ’n oase van lekkerte waar musiek en smake mekaar ontmoet. Tydens ’n dag vol inkopies, feesterrein-verkenning en kultuurbederf, is dit hiér waar jy kan uitspan, ontspan en lekker saam sing! Donderdag skop die kuiertuin op ’n lekker noot af met die betowerende klanke van Bianca Blanc en Wanda Zonke. Smul aan ’n kaasbord saam met Chef Tiaan en SPAR, terwyl plaaslike kunstenaar, Natascha C en haar begeleier Henry-John Williams, se sang en klavierspel die lug vul. Len Muller bring sy sielvolle snitte en as jy ’n fynproewer is, moenie die olie-proe saam met Marinda Engelbrecht en SPAR misloop nie! Vrydag se line-up beloof nóg lekkerness met die talentvolle Thapelo Lekoane en Len Muller wat weer die verhoog betree. Maak jou smaakknoppies wakker met Pasta onder die soeklig met Chef Tiaan en SPAR en geniet die musiek van Meisie en Jack & June. Die geur van kos en klank meng perfek wanneer Marinda Engelbrecht jou wys hoe om geure in jou disse te sit – want by Innibos is dit nie net musiek wat jou siel voed nie! Saterdag bring die groot laaste kuier, en dis ’n fees van musiek, smaak en pure lekkergeit! Volgens Sandra Jacobs, direkteur van die fees, sorg Len Muller en Thapelo Lekoane vir musikale hoogtepunte, terwyl jy kan leer hoe om die perfekte braaibroodjie te pak saam met Chef Tiaan, Rian van Heerden en SPAR. “Dan is dit tyd vir ʼn bietjie Damian Beer en Bianca Blanc, voordat die laaste proe-ervaring jou smaaklik verras, want of jy huil van lekker-lag, of ’n aan-die-brand-mond, gaan jy ’n sousie saam met Marinda Engelbrecht, Janey & Waney en SPAR proe.” En om dinge behoorlik af te sluit, bring Werner van der Hoven sy klanke om jou Innibos-herinneringe nog so ’n rukkie langer te laat speel. Sandra sê dit so mooi: “Innibos is ’n fees van klank, geur en samesyn – en die Everest Wealth Wingerd Kuiertuin bring dit alles bymekaar op ’n manier wat net Innibos kan.” So trek jou skoene uit, skink ’n glasie, en kom ervaar die lekker van Innibos op sy beste in die Everest Wealth Wingerd Kuiertuin!

‘n Magiese Feeservaring by die Laevelder Boma-kuierteater Elke jaar, wanneer die Innibos Laeveld Nasionale Kunstefees sy deure oopmaak, kom mense van oraloor om die unieke atmosfeer, musiek en kuns te beleef, want dis nie net ’n fees nie, dis Innibos. En diep, binne die hart van die feesterrein, waar lag eggo en stories tot lewe kom, lê ‘n besonderse juweel: die Laevelder Boma-kuierteater. Hier word teater en geselskap vermeng met ‘n tikkie magie en ‘n groot skeut humor en dit is alles gratis vir feesgangers! Dit is ’n plek waar jy kan lag tot jou maag seer is, waar jy kan luister na verhale wat jou siel roer, en waar jy deel kan wees van gesprekke wat saak maak. Hier is waarna jy kan uitsien: Ek vra ook maar net? Met Wynand van Vollenstee Datum en tyd: Do 3 Jul 13:00; Vr 4 Jul 16:00; Sa 5 Jul 14:00 Wynand van Vollenstee sit met ’n ondeunde glimlag en ’n twinkeling in sy oog. “Ek vra ook maar net,” sê hy, en die gehoor lag al klaar. Wie is “hulle”? Hoekom is daar veiligheidsgordels in vliegtuie? Wie het besluit dat dieretuine ‘n goeie idee is? En belangriker nog – hoekom ry ons karre vinniger as die spoedgrens? Wynand se vertoning is ’n lawwe, maar slim satiriese reis deur die vrae wat ons almal soms pla, met komiese gevolge. Sosiale media ster en magician! Met Wian van den Berg Datum en tyd: Do 3 Jul 15:00; Vr 4 Jul 14:00; Sa 5 Jul 15:00 Wian van den Berg, die internet-sensasie met 25 miljoen volgelinge, die meeste sosiale media volgelinge in die land, kyk jou reg in die oë en hoewel jou oë hóm ook nie verlaat nie, slaan sy kulkunsies jou stom. Hy het al groot name soos die Springbokke en selfs Mr. Beast met sy magic tricks verblind. Nou is dit Innibos se beurt om betower te word. Sy illusies laat jou twee keer kyk, en sy humor maak dat jy in verwondering lag. Hannon (HANNONS) – Beauty for you Met Hannon Bothma en Christine Steynberg Datum en tyd: Do 3 Jul 16:00; Vr 4 Jul 12:00; Sa 5 Jul 13:00 Soms is styl net so belangrik soos ’n goeie grap – en Hannon Bothma en Christine Steynberg weet dit. Hannon, die Glam Guru, neem ’n spieël en wys hoe jy met ’n paar eenvoudige truuks jouself kan transformeer – maar hy doen dit met soveel humor dat jy nie help om te lag nie. Dit is moeilik om objektief na jouself in die spieël te kyk en ander nie te oordeel as haar lipstiffie té pienk of haar hare té rooi is nie. Die Glam Guru ken al die antwoorde wat hare, grimering en velsorg betref. Of jou hare soggens varsgespyker moet lyk of orkaanbestand moet bly teen die aanslae van die lewe, is Hannon die man met die goue hande en die kunstige tong. Hierdie dinamiese duo gee nie net wenke oor grimering en voorkoms nie – hulle bring ’n show wat jou gaan laat skaterlag én skitter. Internet Sensasie Met Mel die Storieverteller Datum en tyd: Do 3 Jul 12:00; Vr 4 Jul 15:00; Sa 5 Jul 16:00 Daar is min mense wat stories so kan vertel soos Mel die Storieverteller. Sy weet hoe om ’n gehoor vasgenael te hou – of dit nou met ’n grap oor katte of ’n skerpsinnige opmerking oor sosiale media is. Sy beskryf die internet as ’n oerwoud vol ywerige flaminke en ontaktlose (sw)ape – en jy kan nie help om jouself daarin te herken nie. Hierdie vertoning beloof lag, insig en dalk ‘n paar danspassies! Kom geniet ’n reis van vars, oorsponklike en vrek snaakse oomblikke. Afrimat Openbare Gespreksreeks saam met Theo Venter Fasiliteerders: Theo Venter, Kabous Meiring en Lourensa Eckard Datum en tyd: Do 3 Jul 11:00; Vr 4 Jul 11:00; Sa 5 Jul 11:00 Nie alles by die Laevelder Boma-Kuierteater gaan net oor lag nie – soms moet ons ook ’n oomblik neem om die wêreld om ons te verstaan. Theo Venter, Kabous Meiring en Lourensa Eckard bring gesoute kundiges saam om die warmste onderwerpe van ons tyd te bespreek. Is daar hoop vir ons ekonomie? Wat gebeur met Trump en ons regering? En hoe kan ons weet of wat ons lees en sien regtig waar is? Kom luister na kenners en neem deel aan Afrimat se aktualiteisgesprekke. Brandpunt-sake rakende die ekonomie, gemeenskap, politiek en die land gaan onder die loep kom. Kom word wys, lug jou mening en gesels saam. Donderdag: ‘n Uitgestelde begroting en lae ekonomiese groei. Hoe nou gemaak? Met Kabous Meiring, Dawie Roodt, Waldo Krugel. Vrydag: Kan daar sin gemaak word uit Trump en die Regering van Nasionale Eenheid? Met Lourensa Eckard, Roland Henwood, Prince Mashele en Theo Venter. Saterdag: Kan ‘n mens glo wat ons lees en kyk? Die era van valsnuus en sosiale media. Met Theo Venter, De Wet Boshoff, Gert van der Westhuizen en Lourensa Eckard. ATKV- Storievuur Met Ricus Nel, Jak de Priester, Boet Pretorius en Innibos feesbestuurder, Andy Lubbe Datum en tyd: Vr 4 Jul 17:00 As jy ooit gewonder het watter stories agter ons gunsteling musiek lê, dan is die ATKV-Storievuur net vir jou. Boet Pretorius, Ricus Nel en Andy Lubbe deel stories van die musiekbedryf soos jy dit nog nooit gehoor het nie – van onvertelde staaltjies tot die onverwagte oomblikke wanneer liedjies gebore word. ’n Bietjie musiek, ’n bietjie nostalgie, en ’n groot klomp humor maak hierdie eenmalige vertoning op 4 Julie om 17:00 ’n moet-sien-produksie! Hier is voorwaar ’n lekker feeservaring soos geen ander! Hierdie jaar se program beloof om een van die beste nóg te wees – en jy is hartlik uitgenooi om saam te kom kuier! Ekstra lekkerness teen géén ekstra koste!

‘n Magiese Feeservaring by die Laevelder Boma-kuierteater Innibos trek vanjaar ’n splinternuwe, funky baadjie aan om feesgangers nóg meer waarde vir hul geld te gee. Van musiek en kos tot vermaak en verrassings – daar is oral op die feesterrein iets ekstra om jou dag nog lekkerder te maak! Vier verskillende kuierplekke bied boonop gratis lekkerness aan – die kykNET-verhoog, Everest Wealth Kuiertuin by die Wingerd Kuiertuin, die Arena-verhoog en die Laevelder Boma Kuierteater. Hier wag hope vermaak, topkunstenaars en ’n bederf van musiek, kos en lag op jou – alles sonder ekstra koste! As deel van Innibos se 21ste verjaarsdagviering bly kaartjiepryse dieselfde as verlede jaar! Dit beteken jy kry nog meer waarde vir jou geld, veral as inflasie in gedagte gehou word. Die enigste inflasie wat jy by Innibos gaan beleef, is die inflasie van ekstra lekkerness wat op jou wag! Maak seker jy kry jou kaartjies vroegtydig en kom geniet die grootste fees van die jaar. kykNET Country: Stewel vas en Gereed en maak gereed om jou biscuit te skud! Maak seker jy is gestewel en gespoor op Saterdag, 5 Julie 2025, vir die eerste kykNET Country-konsert op die feesterrein. Vanaf 16:00 gaan die kykNET-verhoog brul met die klanke van top country-kunstenaars soos Cordelia, Skemer, Franja du Plessis, Ruan Josh en Chris Else. Sit jou cowboyhoed op en kom skud jou biscuit! Kuierverhoë – Bekendes en vars talente! Of jy nou ’n aanhanger van gevestigde kunstenaars is of nuwe stemme wil ontdek, die kuierverhoë is waar dit gebeur! Vars talent wat die land aan die praat het, sluit in: ONS, Fran Prins en Tamlyn Wessels – hulle bring ’n nuwe klank vol energie en siel. Bekendes wat hul slag gaan wys: Prop, Marno van der Merwe, Janie Bay en Jakkie Louw gaan sorg vir tye wat jy nie wil misloop nie. Die Laevelder Boma-kuierteater bied iets vir almal se smaak! Hiér word feesgangers kuier-kuier aan teater en ander kunsvorme blootgestel. Die Laevelder Boma-kuierteater op die feesterrein bied stukkies teater uit die boonste rakke aan.  Kom geniet kort eenmanvertonings, toneelproduksies en interessante onderhoude. Alle vertonings by die Laevelder Boma-kuierteater is gratis (ingesluit by die hektoegang). Feesgangers kan uitsien na bekendes soos  Wynand van Vollenstee, Wian van den Berg, Hannon (HANNONS) – Beauty for you, Mel die Storieverteller, Matie van Graan, ATKV- Storievuur met Ricus Nel, Boet Pretorius en Innibos feesbestuurder, Andy Lubbe en nog ure se lekker saamskater, kuier en gesels. Everest Wealth-verhoog by die Wingerd Kuiertuin – Fynproewer se Paradys! Vir diegene met ’n fyn smaak vir goeie kos en wyn, is die Wingerd Kuiertuin die plek om te wees. Hier gaan jy nie net smul aan die lekkerste disse nie, maar ook waardevolle kookwenke opdoen: Chef Tiaan wys jou hoe om die perfekte kaasbord te pak en hoe om ’n braaibroodjie meesterlik te maak. Marinda Engelbrecht deel haar geheime oor hoe geur, olie en souse jou disse na ’n volgende vlak neem. Geniet die klanke van Bianca Blanc, Damian Beer, Len Muller en plaaslike sterre soos Thapelo Lekoane, Meisie en Wanda Zonke. Dis kos, wyn en musiek van uitstaande gehalte – pure lekkerness. Meer as net musiek – kom lag jou slap! Innibos bring vanjaar nog meer vermaak op die kuierverhoë – musiek is nie al wat jou gaan laat glimlag nie! André die Skreeusnaakse Hipnotiseur – Hou jou dop, eerder Wees bedag, want jy mag dalk net gehipnotiseer word! Hy meng komedie, drama en hipnose vir ’n skaterlag-ervaring sonder gelyke.  Lag jou slap met Bibi – Daai Girl – Elke dag is daar ’n halfuur van pure komiese genot, waar Bibi met haar snaakse karakters en komediesketse die lagspiere gaan prikkel. Of jy nou vir die musiek, kos, wyn, komedie of net die lekker atmosfeer kom – Innibos 2025 bied iets spesiaals vir elke feesganger. Pak jou hoed, trek jou boots aan en kom geniet die lekkerste fees van die jaar!