Nuus

VISUELE KUNS/ VISUAL ARTFESTIVAL ARTIST/FEESKUNSTENAAR Odette Saayman  – Waar die Kranse Antwoord Gee  Opening: Woensdag 1 Julie 2026 om 18:00 Galery-ure: Daagliks tussen 10:00 en 17:00 Begeleide rondleiding: 12:00 daagliks Plek: Innibos-kunsgalerye by Hoërskool Bergvlam In aansluiting by die oorkoepelende tema van “Volkslied”, is ons trots om Odette Saayman as die Feeskunstenaar vir 2026 aan te bied. In haar derde solo-uitstalling verken Odette ’n verskeidenheid onderwerpe wat Suid-Afrikaanse identiteit vier en die gees van ons land in ’n kragtige visuele uitbeelding definieer. Skilderye, aangebied in olieverf op doek, beliggaam die diversiteit van ons mense in tonele uit die alledaagse lewe. ’n Paar stillewe-uitbeeldings vang die soet vrugte van ons land vas. Ons unieke landskap word skerp uitgebeeld deur Odette se fyn kwashale, waar berge, ruwe kranse en rotsformasies die sintuie op elke vlak prikkel. Portretkuns is een van Odette se gunsteling genres, en ’n aantal portrette is ook ingesluit, gegewe haar besondere waarneming en begrip van die menslike natuur. Deurgaans in Odette se oeuvre speel haar kenmerkende hantering van lig en donker ’n belangrike rol, as ’n metafoor vir ons land se geskiedenis en die veerkragtige vermoë van sy mense om na die lig te kyk. Odette put veral inspirasie uit haar omgewing, elemente van die natuur en die oorvloed van flora en fauna wat deel vorm van haar daaglikse wêreld, en bring die subtiele nuanses daarvan tot lewe. Odette is in 1965 in Pretoria gebore en het ’n BA Honneursgraad in Sielkunde deur UNISA verwerf. Hoewel sy in die stad grootgeword het, was sy nog altyd ’n plattelandse mens in haar hart en het sy in 1997 saam met haar man na die Laeveld verhuis. Haar passie vir kunsskepping is in 2006 aangevuur toe sy ’n geskenk van verf, kwaste en kunsboeke ontvang het. Alhoewel sy selfopgelei is, het verskeie mentors haar natuurlike talent verfyn – onder andere Carl Jeppe, Bob McKenzie en Walter Voigt.In 2010 het Odette ’n lid van die Laeveld Kunsvereniging geword, ’n netwerk van kunstenaars wat haar gehelp het om verdere ervaring in haar kunspraktyk op te doen. Sy is tans ’n lid van die Greater Kruger Kunsvereniging. Odette het gereeld aan groepuitstallings by die White River Gallery deelgeneem. In 2022 het sy haar suksesvolle eerste solo-uitstalling, “Through the Fire”, aangebied, wat haar reis as kankerpasiënt en -oorwinnaar verbeeld. Haar tweede solo-uitstalling is in 2024 by die White River Gallery aangebied. As ’n gerespekteerde Laeveldse kunstenaar maak Odette se volledige toewyding aan haar praktyk, haar hoë standaard van professionaliteit en haar nederige en vrygewige geaardheid haar werk besonder aantreklik, met menige Laeveldse huis wat deur haar kunswerke verfraai word.

VISUELE KUNSGroepuitstalling Volkslied/Anthem VISUELE KUNS Opening: Woensdag 1 Julie 2026 om 18:00 Galery-ure: Daagliks tussen 10:00 en 17:00 Begeleide rondleiding: 12:00 daagliks Plek: Innibos-kunsgalerye by Hoërskool Bergvlam Deelnemende kunstenaars: Bob Mnisi, Dineo Mauke, Elize Buitendag, Eric Manganye, Ingrid Uys, John Moore, Michael Selekane, Rene Eloff, Samantha Maseko, Willem Pretorius en ander ’n Volkslied word gedefinieer as “’n opwindende of opheffende lied van viering wat met ’n spesifieke groep, liggaam of saak geassosieer word”. Nasionale volksliedere is egter patriotiese musikale komposisies wat die geskiedenis, tradisie en oortuigings van ’n nasie simboliseer en ’n kragtige rol speel in ’n land se beeldvorming, saam met vlae, geldeenheid of posseëls. Suid-Afrika se relatief jong volkslied, Nkosi Sikelel’ iAfrika, is gegrond op ’n kombinasie van geskiedenisse en tale, en erken en omarm ons gelaagde en ryk kulturele landskap in ’n enkele lied. Ons volkslied is wêreldwyd uniek deurdat dit twee verskillende liedere kombineer en vyf van die elf amptelike tale insluit, naamlik isiXhosa, isiZulu en Sesotho, met byvoegings van Afrikaans en Engels. In 1897 het ’n Metodiste-sendingskoolonderwyser, gebore in Uitenhage, ’n treffende skoollied gekomponeer genaamd Nkosi Sikelel’ iAfrika – God seën Afrika. Min het hy geweet watter enorme betekenis hierdie lied vir ’n kontinent en ons nasie sou hê. Die lied vorm die basis van ons volkslied, in kombinasie met woorde en musiek van ons vorige volksliedere, The Call of South Africa en Die Stem, geskryf en vertaal deur die bekende Afrikaanse digter CJ Langenhoven. In 1997 is Nkosi Sikelel’ iAfrika in die Staatskoerant afgekondig as die amptelike titel van ons nuut saamgestelde volkslied.Nkosi Sikelel’ iAfrika het ’n ryk, gelaagde vergestalting van ons diepgewortelde nasionale trots geword. Dit bied ’n geestelike konteks deur God aan te roep vir beskerming, sowel as die skenking van seëninge aan sy mense, en vra vir die beëindiging van oorloë en beproewings. Dit erken die prag van ons natuurlike landskap en spoor ons mense aan om te verenig, en verwys na die krag van samehorigheid. Deur die woorde verweef die lied beelde wat visie, doel en eenheid oproep.Suid-Afrika besit nie net majestueuse berge en oseane nie, maar is ook die bewaarder van ’n ryk poel artistieke talent. In hierdie lig is deelnemende kunstenaars versoek om woorde, frases of verse uit ons volkslied te kies en dit visueel uit te beeld.

As daar ooit ’n tyd was om alles wat IN is, eerstehands te beleef, is dit nou! Vanaf 30 April maak Innibos se produksie kaartjieverkope oop en alles wat #trend, kom tot lewe. Met die opwinding wat opbou na Toyota Innibos vanaf 2 – 5 Julie, word feesgangers genooi om hulself te verdiep in ’n wêreld van musiek, teater, boeke, kuns, stalletjies en unieke ervarings wat die Laeveld inner-as IN gaan laat voel. Volgens programbestuurder van Innibos, Philna Scholtz, bied Innibos heelwat uit-die-boks-uit produksies wat geen feesganger moet mis nie. Enig in sy soort, is die Pampelmoesmampoer-produksie ’n moet-sien. Met plaaslike talent sowel as ander bekendes gaan Adriaan van As, Eugené Wait, Jana Fischer, Francois Jacobs, Matie van Graan, Tiaan Slabbert, Steffie le Roux,  Luka Wait en ’n geheimsinnige gasverskyning, die gaste laat gons. Dis ’n unieke plekspesifieke teaterervaring waar drie gesinne se verweefde lewens en lank-verborge geheime stadig ontrafel. In verskillende huise in The Rest Landgoed beleef feesgangers die storie uit uiteenlopende hoeke. Geen twee ervarings is dieselfde nie. Philna sê die gehoor word deel van elke toneel en is selfs gaste by die verlowingspartytjie in die slottoneel, waar die ontrafeling plaasvind.  ’n Ander nuwe leefstylproduksie waar Innibos #trending is, is die South African Institute of Architects (SAIA) Mpumalanga se Argitektoniese Toer met Orbic en Cecilia argitekte. Dis ’n eksklusiewe, gekureerde toer wat feesgangers neem na van die Laeveld se mees inspirerende huise. Argitekte deel hul visie en wys die nuutste neigings in volhoubare en stylvolle binnenshuis-buiteleef ontwerpe.  Innibos spog met ’n Nati-produksie naamlik Sterstof met Ashley de Lange, Ludwig Binge en Wessel Pretorius asook Sirkus L’amour en die Alewige Getoer met Wynand van Vollenstee, Thiart Li, Marissa Claasen en Zoricke Snyman  wat by die fees debuteer.  En wat is ’n teaterprogram sonder Frank Opperman? Hy bring vir oulaas vir ons Reünie, ’n aangrypende en humoristiese blik op ’n skoolreünie waar ou klasmaats hul verlede en ’n gedeelde tragedie uiteindelik konfronteer. Met fyn waarneming en nostalgie bring hierdie eenmanstuk die kompleksiteit van herinneringe en verhoudings tot lewe. Frank is ook te sien in Crybaby saam met Nicole Holm, Wian Taljaard, René Cloete en Gantane Kusch. ’n Absurde tragikomedie oor ’n kind wat skielik die gewig van die wêreld se realiteite moet dra. Die stuk balanseer humor en hartseer terwyl dit vra wat dit regtig kos om groot te word in ’n gebroke wêreld. En dit is net die begin. Feesgangers kan ook uitsien na produksies soos Sandra Prinsloo in Die Ander Dogter, Deon Meyer (verteller en teks) en Coenie de Villiers (klavier, sang en musiek) in die produksie Karoo-Keur, asook die Lefra-produksie, Het van Verlangekraal waarvan Leon van Nierop die teks van Johann Bekker tot verhoogstuk verwerk het. Amanda Strydom, Je-ani Swiegelaar en Coenraad Rall (Klavier) is te sien in Tillie Matilda wat die lewe van twee straatvroue uitbeeld. Hierdie was ’n treffer by die onlangse KKNK. Ons klassieke program sluit ook produksies in soos Voices of the Soul, Songs of Love en Koffie Kantata. Teaterliefhebbers kan uitsien na die gesinstoneel, Jakkie NOU! Die Drie Varkies en die Gen Z Wolf met Jakkie Louw, Clarissa Jooste, Simone de Jager en Monique Barnard. Hierdie gaan fesgangers van oud en jonk bekoor. Feesgangers kan ook uitsien na produksies soos Tronk met ’n D met Elzabé Zietsman wat hierin die rol van Daisy de Melker vertolk. By Innibos is daar net een ding wat UIT moet wees: suinigheid, en daardie “ek-sal-volgende-jaar-gaan”-verskonings. Wat IN moet wees? Jou geesdrif om alles te beleef en nie ’n enkele oomblik van hierdie kreatiewe fees te mis nie. Kaartjies en volledige inligting is beskikbaar by innibos.co.za.

By Toyota Innibos Laeveld Nasionale Kunstefees 2026 gaan dit oor een ding: alles wat IN is en ons weet JY is beslis IN! Ná oorweldigende publieke navraag is die gewilde premium feeservaring in die Bespreekte Area vanjaar uitgebrei sodat nóg meer feesgangers die lekkerte kan geniet. Volgens Andy Lubbe, feesbestuurder van Innibos, bied die Bespreekte Area die perfekte kombinasie van gemak, eksklusiwiteit en feespret en in 2026 vat ons dit net nóg ’n vlak hoër. Hy sê verder dat heelwat feesgangers ’n meer eksklusiewe ervaring wil hê en dat die feesbestuur daadwerklik opgetree het om meer bespreekte stoele (goue sirkel)  kuiertafels en veldlosies (pods) by die aandkonserte te bied. Hoofverhoog vermaak: Die vermaak op die hoofverhoog is net so IN soos die Bespreekte Area self, met elke aand wat ’n unieke energie en mengsel van kunstenaars bring. Donderdagaand se Huisgenoot Afskopkonsert skop die fees af met groot name soos Die Heuwels Fantasties, Elvis Blue en Karlien van Jaarsveld, asook  gunstelinge soos Ricus Nel, Van Pletzen en Die Piesangskille, ’n aand propvol saamsing en nostalgie.  Vrydagaand neem die Jacaranda FM-konsert oor met ’n kragtige kombinasie van kunstenaars. Van Bobby van Jaarsveld en Juanita du Plessis tot die alternatiewe klanke van Fokofpolisiekar en Spoegwolf, terwyl Riaan Benadé en Zaan Sonnekus sorg vir hoogtepunt na hoogtepunt. Op Saterdag, 4 Julie 2026, pak die Springbokke Engeland, en die wedstryd sal regstreeks op die groot skerms uitgesaai word. As jy kan onthou hoe elektries die atmosfeer verlede jaar was, sal jy weet, hierdie is iets wat jy eenvoudig nie kan misloop nie. Om 19:00 bars die kykNET-hoofverhoog los met ’n sterbelaaide konsert wat kunstenaars soos Appel, Francois van Coke, Brendan Peyper, Early B, Elandré, BlackByrd en vele meer insluit, ’n viering van alles wat gewild, IN en relevant is.  “Feesgangers moet egter onthou: die geadverteerde line-ups is net die begin. Verrassingselemente en ekstra kunstenaars gaan deurentyd opduik, want by Innibos is verrassings ook beslis IN en #trending hierdie jaar!” Premium Ervaring in die Besrpeekte Area: Behalwe die “mosh pit” waar oud en jonk hul litte kan gaan swaai reg voor die hoofverhoog, begin die premium ervaring in die Bespreekte Area met meer spasie, meer vibes en meer mense wat IN is. Daar is elke aand 50 kuiertafels beskikbaar:  Donderdagaand teen R1 210, Vrydag teen R1 810 en Saterdag R2 110 per tafel van 6 mense. Sodra jy jou tafel bespreek het, druk eenvoudig jou bespreking uit en met jou aankoms by die Goue Sirkel sal sekuriteit vir jou 6 individuele armbande oorhandig,  een vir elke gas by jou tafel. Indien jy nie ’n tafel wil bespreek nie kan jy ’n stoel in die goue sirkel bespreek. Daagliks is daar 540 bespreekte stoele beskikbaar: Donderdag en Vrydag kos dié kaartjies R160 pp en Saterdag R210. Armbande kan met jou aankoms by sekuriteit by die Goue Sirkel-ingang afgehaal word. Jy kan ook ‘n feesterrein parkeerkaartjie koop teen R260 per dag. ’n Beperkte hoeveelheid veldlosies is tans nog beskikbaar, ideaal vir korporatiewe onthaal, kompleet met ’n eie kelner wat drankies bedien vanaf die kroegarea.  En moenie bekommer oor kos nie. Bestel jou gunsteling feeskos by enige stalletjie en bring dit direk na die Bespreekte Area waar jy gaan kuier. Andy  beklemtoon dat die Bespreekte Area se premium ervaring NIE die algemene feesterrein toegang insluit nie. Toegang tot die feesterrein kos R250 vir Donderdag, R325 vir Vrydag en R385 vir Saterdag.  Hierdie is nie net ’n plek om te sit nie. Dis waar die fees lééf, dans, saamsing en herrinneringe bou! Neem asseblief kennis dat dit nie nodig is om plek in die Bespreekte Area te bespreek om die konserte te geniet nie. Feesgangers is welkom om steeds die atmosfeer vanaf die pawiljoene of gras rondom die Bespreekte Area te beleef teen geen ekstra koste buiten die gewone feesterreintoegangsfooi nie. Alles wat IN is, gebeur by Innibos: van topvermaak tot onvergeetlike rugby-oomblikke. So die vraag bly: Is JY IN vir ’n premium ervaring in die Bespreekte Area? Vir kaartjies en info besoek: innibos.co.za

Mbombela – Die gewilde Toyota Innibos is terug en in 2026 vier ons ALLES wat IN is! Van musiek en teater tot boeke, kuns en stalletjies. As dit #trending is, vier ons dit saam as jy ook IN is! Die fees vind die jaar vanaf 2 – 5 Julie plaas by Hoërskool Bergvlam in Mbombela/ Nelspruit, en beloof om weer duisende feesgangers van regoor die land te verras met ’n propvol program en onvergeetlike ervarings wat IN is. Ons is ook opgewonde oor ons hoofborg, Toyota, wat hierdie jaar vir seker weer IN is! Feesgangers kan uitsien na ’n opwindende hoofverhoogprogram oor al drie aande met van ons land grootste name in die bedryf. Onder die kunstenaars wat vanjaar die verhoog gaan laat dreun, is Die Heuwels Fantasties, Die Piesangskille, Elvis Blue, Karlien van Jaarsveld, Ricus Nel, Van Pletzen, Bobby van Jaarsveld, Fokofpolisiekar, Juanita du Plessis, Riaan Benadé, Spoegwolf, Zaan Sonnekus, Appel, Barto, BlackByrd, Brendan Peyper, Early B, Elandré, Eloff, Francois van Coke, Irene-Louise van Wyk, Juan Boucher en Riana Nel. Benewens die hoofverhoogproduksies, kan feesgangers ook uitsien na vier kuierverhoë wat van die  oggend tot die aand vermaak gaan bied, musiek wat IN is, op een terrein! Ons het verskeie verrassings waarna feesgangers kan uitsien. Ander hoogtepunte sluit in die Springbok rugbywedstryd die Saterdag voor die aandvertoning en die Loof Hom Innibos op Sondag, 5 Julie, by Church Unlimited, teen R50 per persoon. Volgens Alison Linde, hoof van die BosMôl, is die stalletjies uit die boonste gestaltes. “Die stalletjiekeuring was streng en ons het die beste van die bestes wat by die fees gaan uistal. Ons het balans gebring deur so groot as moontlik verskeidenheid in die aanbieding te bring. Die kosstalletjies is ook baie sorgvuldig gekeur om goeie, smaakvolle en “uit-die-boks-uit” feeskos te bring.”  Daar is ook ’n groot verskeidenheid stalletjies wat spesifiek op ons mans gefokus is vir ’n lekker koop-ervaring vir almal.  Volgens Andy Lubbe, feesbestuurder, is dít wat ons bied, en dít wat feesgangers betaal, steeds ’n winskopie. Vir die hoeveelheid wêreldklas kunstenaars en vermaak wat jaarliks op die feesterrein aangebied word, is die prys ongeëwenaar.  Vir slegs R775 kan jy ’n weekkaartjie koop wat jou eindelose vermaak gaan verskaf. Dagkaartjiepryse beloop R250 vir Donderdag, R325 vir Vrydag and R385 vir Saterdag.  Laerskoolkinders van 13 jaar en jonger kry gratis toegang tot die feesterrein en senior burgers (65 jaar en ouer) geniet op Donderdag alleenlik ’n spesiale afslagprys van R195. Ons nooi dus al ons senior burgers uit om spesifiek Donderdag die stalletjies en konserte te kom geniet teen dié afslagprys. Vir die res van die fees geld normale pryse. ’n Groot hoogtepunt van 2026 is die uitgebreide Goue Sirkel-ervaring. “Ons het meer kuiertafels as verlede jaar omdat ons oorval was met versoeke vir ’n groter gouesirkel-ervaring. Dit was uiters populêr en binne minute uitverkoop verlede jaar,” sê Andy.  Ons het ook goeie nuus vir die jonk van hart. Hierdie jaar het ons ’n afgebakende “mosh pit” reg voor die verhoog waar hulle saam met hul gunstelingkunstenaars kan sing en dans. Agter die mosh pit begin die Goue Sirkel-area met bespreekte stoele teen: R160 vir die Donderdag en Vrydag en R210 vir Saterdag.  Feesgangers, bring al jou vriende wat IN is en bespreek sommer ’n kuiertafel vir 6 persone teen R1 210 vir Donderdagaand, R1 810 vir Vrydagaand en R2 110 vir Saterdagaand. Feesterrein parkeerkaartjies kos R260 per dag.  As jy ’n Tjirp-leser is, kan jy reeds 30 Maart die Early-Bird voordeel geniet en jou feesterreinkaartjies aanlyn koop. Publieke feesterreinkaartjieverkope open 1 April  en dis géén April-fools grap nie! Teaterproduksie kaartjieverkope open op 30 April. Hou die spasie dop! Vir meer inligting en kaartjies, besoek: innibos.co.za Toyota Innibos 2026 – ALLES wat IN is. Nou wil ons by jóú weet: Is JY in? Want JY is al wie kort!

Wat jou feeskaartjie werklik koop: Die finansiële hartklop van Innibos Agter elke glimlag en treffende verhoogoomblik by die Toyota Innibos Nasionale Kunstefees, skuil ’n reuse-organisasie wat jaarliks die fees in ’n wêreldklas kuns- en kultuurbelewenis omskep. Die Innibos Kunstefees is veel meer as nét ’n musiekfees; dit is ’n lewende organisme wat bestaan uit musiek, toneel, kuns, boeke, straatvermaak, stalletjies en gesinsvriendelike aktiwiteite wat feesgangers deurentyd vermaak en betrek. Die fees, wat jaarliks in Mbombela/Nelspruit aangebied word, het sedert sy ontstaan in 2004 ’n belangrike item op Suid Afrika se kultuurkalender geword, en is al telkemale as die land se gewildste kunstefees aangewys. Maar om so ’n grootskaalse ervaring te skep, verg ’n enorme finansiële en logistieke masjinerie—iets waarvan die publiek dikwels weinig bewus is. Hoewel daar soms beweer word dat die fees “duur” is, is die werklikheid juis die teenoorgestelde. Innibos se hektoegang bly, in vergelyking met die werklike koste om die fees aan te bied, en dít wat feesgangers kry, steeds ’n reuse winskopie. Volgens feesbestuurder Andy Lubbe probeer die feesbestuur elke jaar om Innibos so bekostigbaar moontlik vir gesinne te hou. “Al die vermaak op die feesterrein—vier kuierverhoë, ’n hoofverhoog, boekgesprekke, kunsuitstallings, kindervermaak en meer—is reeds by jou toegangskaartjie ingesluit,” verduidelik hy. Boonop betaal Laerskoolkinders geen toegangsfooie nie. Die werklike koste van ’n wêreldklas-fees Innibos se kostestruktuur is omvangryk. Om die feesterrein veilig, funksioneel en feestelik te maak, beloop die logistieke uitgawes alleen sowat R4,7 miljoen. Dit sluit elektriese dienste, kragopwekkers, toegangstelsels, vervoer, tent- en toerustinghuur, toilette, sekuriteit, terreinvoorbereiding, opruiming, verkeersbestuur en ingenieursertifikate in. Die programkoste op die feesterrein beloop ongeveer R8,7 miljoen. Dit sluit die kunstenaarsfooie van alle hoofverhoog- en kuierverhoogkunstenaars en buskers in, asook die oprigting van alle verhoë, klank, beligting en spesiale effekte. Teaterproduksies wat buite die feesterrein in venues aangebied word, kos ’n verdere R1 miljoen, en die gratis Loof Hom Innibos-konsert nog R75 000. Verder beloop reis-, verblyf- en etekoste vir kunstenaars en tegniese personeel sowat R1,6 miljoen. Pendeldiense, bemarking, webwerf-instandhouding, kunsuitstallings, borgskapsverwante uitgawes en gemeenskapsprojekte kos nog R3 miljoen. Saam met salarisse van die permanente personeel, wat heeljaar werk om die fees se vele aspekte te organiseer, kantooruitgawes, projekbestuurders, tydelike werkers, finansiële kostes en administrasie beloop die totale koste van die fees meer as R23 miljoen per jaar. Waar kom die geld vandaan? Inkomste uit kaartjieverkope, stalletjiehuur, en die wins uit die biertente bring saam ongeveer R13 miljoen in. Dit beteken dat Innibos jaarliks ten minste R10,5 miljoen in kontant- en diensteborgskappe moet inbring net om gelyk te breek. Die werklikheid is eenvoudig: sonder borge sou die fees nie kon voortbestaan nie of baie duur vir feesgangers wees. As maatskappy sonder winsbejag, word Innibos wetlik verplig om enige winste of surplus fondse (indien daar enigsins is) direk terug te belê in volgende jaar se fees of in die bufferfonds. (Hierdie bufferfonds was byvoorbeeld lewensbelangrik tydens die Covid-jare toe Innibos vir drie jaar nie kon plaasvind nie.) Watter winskoop is Innibos werklik? Tydens die 2025-fees het ’n verstommende 178 kunstenaars op die feesterrein opgetree. ’n Weekkaartjie, wat elke dag toegang tot die feesterrein verleen het, het tussen slegs R550 en R660 Dit beteken dat ’n feesganger minder as R4 per kunstenaar betaal het—iets wat byna ongeëwenaard is in die Suid-Afrikaanse vermaakbedryf. Vergelyk dit met die pryse van enige enkelkonsert, en die waarde van Innibos word onmiddellik duidelik. Die nalatenskap van Innibos Wanneer die laaste ligte uitdoof en die terrein stil raak, bly een ding glashelder: Innibos bestaan omdat duisende mense saamwerk, omdat borge in die kunste glo en hulle assosiasie met die fees waardevol ag, en omdat feesgangers elke jaar hul harte en sakke oopmaak om kultuur te ondersteun. Ten spyte van enorme koste, bly Innibos daartoe verbind om ’n wêreldklas-, toeganklike en bekostigbare fees vir almal aan te bied. Die fees, se ekonomiese inspuiting in die plaaslike ekonomie het in 2025 ’n merkwaardige R100,5 miljoen beloop—’n bewys van die fees se impak en relevansie. Die amptelike bywoningsyfer vir 2025 was 78 000. Innibos sien uit om jou in 2026 weer te verwelkom, waar ons alles wat IN en #trending is, gaan vier!