2025

Afrikaans Vier 100 Jaar – ’n Eeufees van Taal, Kultuur en Hartklop by Toyota Innibos Hier in die hart van die Laeveld, waar bos en berge mekaar in ’n groen omhelsing vashou, is die lug hierdie jaar gelaai met iets besonders. Dis nie net die geur van roosterkoeke wat Innibos hierdie jaar vul nie – dis ook die klank van trots. Afrikaans is 100 jaar oud, en Toyota Innibos, as een van die land se mees geliefde kunstefeeste, vier dit met oop arms en ’n warm hart. Afrikaans is nie net ’n taal nie – dis ’n lewe, ’n asem, ’n storieverteller wat deur generasies gefluister het. Dit is die taal van gesellige familietye, diep gesprekke onder die sterre, digkuns wat jou diepdenkend laat, en musiek wat die siel roer. En hierdie jaar vier ons nie net ’n eeu van bestaan nie – ons vier ’n eeu van groei, van kreatiwiteit, van kultuur wat onwrikbaar vashou aan sy wortels, maar steeds vlerke kry. Volgens Andy Lubbe, feesbestuurder van Toyota Innibos is die ’n taalviering soos nog nooit tevore nie. Van musiek en toneel, tot boeke en poësie, is Afrikaans nie net die medium van kommunikasie by Innibos nie, dit ís die fees self. Skrywers, digters, sangers, akteurs, en kunstenaars kom saam om hul liefde vir Afrikaans te deel – nie net in formele aanbiedings nie, maar in elke woord, lag en noot wat oor die teaters en feesterrein gaan weerklink. Afrikaans is ’n vriendelike en inklusiewe taal wat mense en kulture bymekaar bring deur gedeelde stories en begrip. Afrikaans is die jongste Germaanse taal in die wêreld, en tog is dit een van die rykste wanneer dit kom by uitdrukkings en kreatiewe idiome. Dis ook een van die min tale wat aktief in alle genres van kuns en kultuur beoefen en bevorder word – van kontemporêre musiek en film tot klassieke letterkunde en kinderverhale. En waar het mens ’n taal so kleurvol en ryk gekry wat gevoelens kan vasvang wat in geen ander taal uitgedruk kan word in een woord nie…LEKKER! Ook Toyota Innibos se tema die jaar. As deel van die Saterdagaandkonsert, waar van Suid-Afrika se grootste kunstenaars die verhoog betree, sal daar ’n spesiale insetsel wees – ’n eerbetoon aan Afrikaans, sy ontstaan, sy mense en sy toekoms. Dis ’n oomblik waar ons almal stil sal staan, nie net om te onthou nie, maar om te erken: hierdie taal leef, en dis ons wat dit lewendig hou. Soos Andy dit raak beskryf: Afrikaans is nie net woorde op papier nie, en ook nie net nog ’n taal nie. Dis ons hartklop.” Laat hierdie jaar se Innibos vir altyd onthou word as die een waar ons ons taal nie net gevier het nie – maar dit laat dans het. Kom, wees deel daarvan. Want Afrikaans lééf, dis in ons bloed!

Innibos word mondig – en jy’s uitgenooi na die lekker, lekkerder, lekkerste fees nog! Dis amptelik: Toyota Innibos vier vanjaar sy 21ste bestaansjaar – en dié fees word groter, kleurvoller en lekkerder as ooit vantevore! Soos ’n jongmens wat mondig word, staan Toyota Innibos 2025 trots op sy eie voete met ’n storie van een-en-twintig jaar se kultuur, kuns, musiek en onvergeetlike herinneringe. En ja, daar is groot planne om dié mylpaal behoorlik te vier! Vandat ons die jaar ons deure oopgegooi het, het Toyota Innibos feesgangers bederf met talent van regoor Suid-Afrika, en dié jaar word die tradisie met ekstra flair voortgesit. Ons sê nie verniet: lekker, lekkerder, lekkerste, nie! Die Innibos-span is propvol verrassings vir sy feesgangers wat jy nie wil misloop nie. Geen Verhoging, ons geskenk aan JOU In ’n tyd waar alles duurder word, het Toyota Innibos besluit om kaartjiepryse dieselfde te hou as verlede jaar. Dis ons geskenk aan ons lojale feesgangers, ’n manier om te sê dankie vir elke voetstap, elke handeklap en elke lag oor die afgelope twee dekades en meer. Ons weet dis juis julle wat dié fees se hart laat klop, en dis vir ons ’n groot voorreg om dit op só ’n manier te kan teruggee. 21 Minute van afslag Volgens Alison Linde, stalletjiebestuurder van Toyota Innibos, lê sy klem op 21 Jaar, 21 Minute, en  21 Redes om vroeg daar te wees! As deel van die 21ste bestaansjaar-vieringe, gaan die geliefde Bosmôl – die bruisende hart van handwerk, kreatiwiteit en geurige kosstalletjies – elke dag om 11:00 én 16:00 vir presies 21 minute spesiale aanbiedings en verrassings hê. Elke liewe stalletjie, ja, ook die kosstalletjies, neem hieraan deel! Of dit afslag, gratis happies, kompetisies of unieke produkte is, of jy die 21ste persoon is wat die stalletjie besoek, of 21 minute in ’n stalletjie vertoef, jy weet nooit wat jy gaan kry nie. Maar wat ons wél weet: jy wil nie laat wees nie. Maak seker jou horlosie is gestel – dié is Innibos se manier om jou terug te bederf vir 21 jaar se ondersteuning. Vernuwing en Vars Uitleg  – 21 jaar se lekkerness Soos enige 21-jarige wat nuwe horisonne betree, het Toyota Innibos 2025 ook ’n vars terrein-uitleg! Die Bosmôl se uitleg geskuif om ’n meer vloeiende, gemaklike en opwindende ervaring vir feesgangers te skep. Die nuwe uitleg bring nuwe hoeke, verrassende ontmoetings en beter uitsigte – perfek om die samesyn en feestelike gees nog hoër te laat vlam. Ons hoofverhoog met sy langer T-uitleg, gaan die kuiertafel en bespreekte stoel area nader aan die kunstenaars bring. Of jy kom vir die musiek, die kos, die kuns of sommer net die kuier – Toyota Innibos 2025 belowe om die ekstra lekkerness in jou feeservaring te sit. Met spesiale verrassings regdeur die terrein, eksklusiewe aanbiedinge, ’n feesprogram wat jou asem gaan wegslaan en nuwe ruimtes om te ontdek, gaan hierdie nie net ’n verjaarsdag wees nie – dis ’n volwaardige kultuurpartytjie van formaat! Van 3 tot 6 Julie roep ons jou: kom vier saam met ons die groot 21! Trek jou gemaklikste skoene aan, bring jou lekkerste lag saam, en kom ervaar ’n fees wat volwasse geword het – maar nog lank nie ophou droom nie. Innibos 2025 – dis ons fees, dis jou fees, dis die LEKKERSTE fees soos net die Laeveld dit kan doen!