Toekennings

Dana Snyman – Geliefde Storiesmous In die Republiek van Rondomskrik kraai veelbekroonde Dana Snyman koning as gesoute reisjoernalis, geliefde storiesmous en gerekende dramaturg.  Vra ’n mens vir Dana hoekom hy skryf, sal hy iets sê soos, ek hou van stories en stories hou van my ook; of, hierdie land verwond ons almal knaend op allerhande maniere, en iemand moet weet hoe dit was. Nie ter wille van nostalgie nie, maar ter wille van die opskrywe van sy mede-verskriktes se beleefde ervarings. Dana glo as jy die regte vraag vra, en dan lank genoeg stilbly, almal ’n storie het om te vertel. Vra jy sy gretige lesers hoekom hulle so graag lees wat Dana skryf, sê hulle: Sy sketse is die beste; ’n Skerper waarnemingsvermoë en beter storieverteller sal jy nie sommer kry nie; Hy lê met aangrypende eenvoud gewone mense se beleefde ervarings allerversigtig bloot; Met net ’n paar woorde skep hy ’n atmosfeer en jy voel jy is daar saam met hom; Sy stories laat ’n mens bietjie anders dink; Man, mens lees net so lekker aan ’n Dana Snyman – die waarheid gejas met die gevoel van prosa.   Sy eerste boek, ’n versameling rubrieke, Uit die binneland (2005) was ’n drie onder pale. Suid-Afrikaners uit alle geledere het die stories opgelek en sedertdien is elke boek deur Dana ’n topverkoper. Hy vang die tydgees vas met sy deernisvolle verhale van mense wat oor allerhande grense die hande na mekaar uitsteek.  Saam met hom kan ons reis na plekke soos Poffertjiesgat, Knoffelfontein en Dikboompies. Saam met hom kan ons huil oor dwalers langs ons land se paaie. Saam met hom kan ons lag vir ons eie tekortkominge. Saam met hom kan ons altyd weer ’n draai gaan maak by Hopetown, die hoofstad van Rondomskrik. Soos Pottie Potgieter en Ds Tienie Benade het Dana Snyman in ons harte vir hom ’n plekkie ingerig. Dankie, Dana, vir al jou stories, wat ons net so nodig het soos water. Dankie Dana! – Dana Snyman Vereringsgeleentheid Sa 5 Jul 16:00 Gesprekleier: Annemarie van der Walt ’n Boek is vir die siel soos wat ’n slypsteen vir ’n swaard is. Innibos vereer vanjaar geliefde skrywer, Dana Snyman. Hy noem homself ʼn storiesmous, maar is veel meer – hy skryf rubrieke, kortverhale, eenmanvertonings, romans en het selfs sy eie televisiereekse gehad. Dana Snyman is volksbesit en sy skryfwerk is toeganklik vir die breë publiek. ʼn Hele program met Wilhelm van der Walt, Stephanie Baartman, Lizanne Barnard en Eugené Wait is rondom sy skryfwerk opgestel en dit is waarmee Innibos wil sê: Dankie, Dana, vir al die genot wat jou skryfwerk die leser oor die jare verskaf het.

Toyota Innibos vereer Kurt Darren – ’n Legende van Afrikaanse Musiek Kurt Darren is ons eie Sokkiekoning en ’n trefferfabriek van Afrikaanse dansmusiek. Sy liedjies is op elke speellys waar daar partytjie gehou of gedans word. Daarby geniet sy treffer “Kaptein,” wat selfs op stadions buite die landsgrense gespeel word sodra ’n Springbok gewaar word, die status as ons nie-amptelike volkslied. Ná dertig roemryke jare in die vermaaklikheidsbedryf, seil hy steeds volstoom voort en het al in 15 verskillende lande anker gegooi. Hy skryf die meeste van sy liedjies self en treffers soos “Kaptein,” “Hemel op Tafelberg” en “Meisie Meisie” is al 35 keer deur sangers in Nederland, België en Duitsland vertaal en opgeneem.  For Your Precious Love, sy eerste album, verskyn in 1995. Sy groot deurbraak kom egter eers in 2002 toe die titelsnit van sy sesde album, Meisie, Meisie, die treffersparade haal. In 2008 tref “Kaptein” die lug en dit word ’n immergroen treffer wat ná 17 jaar steeds die voete laat jeuk.  Tans is daar ’n imposante 30 albums agter sy naam. Sy jongste wegholtreffer, “Hop, hop, spinnekop,” wat in November 2024 vrygestel is, spog met 65 miljoen kyke op TikTok en meer as 5.4 miljoen op YouTube. Sy musiek is al bykans 120 miljoen keer op verskeie digitale musiekplatforms gestroom en op YouTube is sy musiekvideo’s al meer as 240 miljoen keer gekyk. Vanaf 2006 tot 2011 bied hy die gewilde musiekprogram “JukeBox” op kykNET aan. Hy het selfs al sy lyf akteur gehou in films soos “Liefling” en “#LoveMySelfie.” Op sy kerfstok pryk vele toekennings, onder andere 9 SAMA’s, 12 dubbelplatinum en 21 goue verkope-toekennings, sowel as prestige toekennings van Tempo, Ghoema, Vonk en Geraas. Sy impak op die plaaslike musieklandskap is onmiskenbaar. Hy lewer ’n enorme bydrae tot die evolusie van moderne Afrikaanse musiek en bring dit ook na internasionale gehore. Innibos vereer Kurt Darren, die Kaptein van Lekkerness, vir sy lewenslange toewyding aan Afrikaanse musiek. Danksy hom gaan ons nog lank op tafels dans!