Kuns

KUNS GROEPUITSTALLING Tuiskoms/Homecoming Innibos bied met trots ’n groepsuitstalling aan wat kunstenaars ten toon stel wie se artistieke talent geïnspireer is deur die diverse en unieke natuurskoon van die Laeveld en Mpumalanga. Die Laeveld word allerweë  beskou as ’n streek met ’n ryk biodiversiteit, en die omgewing se energie en lig, sowel as sy ryk plant- en dierelewe, inspireer kunstenaars al eeue lank. Daarbenewens bied die kulturele diversiteit van die omgewing ’n artistieke platform waarbinne  ’n wye reeks sosiale dinamika verken kan word. Hierdie uitstalling verken spesifiek hoe die Laeveld die werk van kunstenaars beïnvloed het – dié wat hier woon, sowel as dié wat tyd hier spandeer het en nou elders woon, maar steeds hul ervarings en die omgewing se invloed in hul kreatiewe uitdrukking  vergestalt. Ons kyk spesifiek na kunstenaars uit ons artistieke diaspora, wat nou regoor Suid-Afrika en selfs oorsee hul merk maak. Ons sluit ook die minder bekende kunstenaars in, wat al lank in die gebied gewortel is en deel vorm van ons ryk artistieke erfenis. Hierdie veelvlakkige uitstalling bied werk in groot- tot kleinskaalse formaat, in ’n verskeidenheid mediums, insluitend skilderkuns, beeldhouwerk en keramiek. ’n Paar werke deur die feeskunstenaar Reuben Mpangane sal ook vertoon word. Die uitstalling sal op 2 Julie geopen word deur Me L Mabuza,  LUR van die Mpumalanga Departement van Kultuur, Sport en Ontspanning. Meer Inligting Opening: Dinsdag 1 Julie 2025 om 18:00 der LUR L Mabuza Galery-ure: Daagliks tussen 10:00 en 17:00 Begeleide Rondleiding: 12:00 en 15:00 daagliks Venue: Innibos Kunsgalery by die  Bergvlam Hoërskool Restaurant Deelnemende kunstenaars: Reuben Mpangane, Erica Schoeman, Odette Saayman, Mariana Zwaan-de Bruin, Winston Thekiso, Bob Mnisi, Ingrid Uys, Wendy Sippel, Lisa Tristram, Annalie Odendaal, Wendy Malan, John-Anthony Boerma, Leigh Voigt, Matthew Koster, Michael Selekane, Maria Pienaar, Cyril Chiburre Kurator: Dana MacFarlane

FEESKUNSTENAAR 2025 Uitstalling deur Reuben Mpangane Dit is vir ons ’n groot voorreg om Reuben Mpangane as die 2025 Innibos feeskunstenaar aan te kondig. As ’n gevestigde en hoog aangeskrewe kunstenaar en opvoeder wat al jare lank in die Laeveld woon, vier Reuben vanjaar sy 50ste jaar as visuele kunstenaar – ’n merkwaardige mylpaal wat getuig van vyf dekades se artistieke talent. Reuben is in 1953 in Kaapschehoop gebore. Sy uitgebreide loopbaan word gekenmerk deur ’n kombinasie van artistieke en opvoedkundige prestasies. Hy het ’n BA-graad in Beeldende Kunste aan Unisa voltooi, en het daarna ’n B.Ed.-graad aan die Universiteit van Pretoria verwerf. Dit is opgevolg deur ’n Hoër Onderwysdiploma (Nagraads) en ’n Sertifikaat in Kuns-Spesialisasie aan Unisa. Aanvanklik is Reuben se belangstelling in kuns aangewakker deur sy ma, wat nou 91 jaar oud is  en steeds aktief met handwerk besig is. Latere invloed het gekom van Di-Ann Johnson-Ackermann, wat informele kunsklasse aangebied het en Reuben se pen-en-ink-tekeninge plaaslik en internasionaal bemark het. Hy is ook geïnspireer deur wyle Bruce Ponting, eienaar van die Nelspruit Kunsgalery. Verdere invloedryke figure in sy loopbaan sluit in Steven Sack en professor Keith Dietrich, wat hom veral tydens sy studies ondersteun het. In 1988 het Reuben sy eerste suksesvolle solo-uitstalling by die Nelspruit Kunsgalery aangebied. Alle werke in dié uitsalling is verkoop. Sy tweede uitstalling by dieselfde lokaal in 1989 het sy reputasie as gerekende kusntenaar bevestig. In dieselfde jaar het hy ’n solo-uitstalling en kunswerkwinkel saam met Nat Ntombela by die Kanyamazane Saal aangebied. Hierna het talle suksesvolle  solo- en groepuitstallings gevolg, beide plaaslik en internasionaal. In 2018 het hy deelgeneem aan ’n groepuitstalling by die Mbombela Burgersentrum saam met Fikile Skosana. Hy het ook by Innibos en Tupelo in Kaapstad uitgestal. Sy werk vorm deel van gesogte versamelings, soos onder andere in die Mpumalanga Wetgewersgebou, die Parlement in Kaapstad en die Ontwikkelingsbank in Midrand. Reuben skep in ’n wye verskeidenheid mediums, insluitend hout- en metaalbeeldhouwerk, verf en collage. Met verloop van tyd het sy tegniek om herwinde plastiek en hergebruikte materiale in kleurvolle collagewerke te omskep, ontwikkel. Hierdie vernuwende benadering,  waarin hy kleure in lae aanwend om unieke ondertone en teksture te skep, het kenmerkend van sy werk geword en getuig van sy toewyding om omgewingskwessies aan te spreek.  Deur sy artistieke reis het Reuben sy fokus verbreed van Township Art na meer konseptuele temas oor sosiale samehorigheid, geïnspireer deur sy ervarings van die  township-lewe in ’n onstuimige tydperk. Buiten sy skeppende werk vervul  Reuben ook ’n belangrike rol as opvoeder en mentor. Hy dien tans as Projekbestuurder vir Emathalente Training in Mbombela, ’n  nie-winsgewende organisasie, waar hy agt dae per maand onderrig in handvaardighede gee aan mense met gestremdhede. Sy werksessies dek verskeie dissiplines, van kuns en handwerk tot metaalontwerp en die maak van  funksionele metaal-houtmeubels. Een van sy noemenswaardige gemeenskapsinisiatiewe was die aanbied van kuns- en kultuurwerkswinkels vir onderwysers in die Gert Sibande- en Sekhukhune-distrikte via die MTN/Umbalabala Training-inisiatief tussen 2008 en 2012.  Reuben glo in die krag van gemeenskap en die sosiale impak van die kunste. Sy verbintenis hiertoe  het hom geinspireer om klassieke jazz-klavier aanlyn te studeer, wat sy kreatiewe uitdrukking verder verryk. Reuben se lewe en werk is ’n toonbeeld van toewyding aan die  kunste, opvoeding en gemeenskapsopheffing. Meer Inligting Uitstalling : 2 tot 27 Julie  2025 Venue: Witrivier Kunsgalery, Casterbridge-sentrum, Witrivier Galery Ure : Daagliks tussen 09:00 and 16:00 (Saterdae tussen 09:00 and 14:00) Kunsrondleiding: 10:30 daagliks vanaf 3 tot 6 Julie 2025

Innibos Kunsuitstalling – Daar is Afrikaans in my tee Uitstalling deur Jak de Priester Koppieteefontein is die hoog suksesvolle onderhoudsprogram aangebied deur sanger, liedjieskrywer Jak de Priester en reeds in die 7e seisoen op kykNET. Wat die program ekstra spesiaal maak, is die unieke teepotte wat Jak vir sy gaste gee as eerbewys vir hulle enorme bydrae tot Suid-Afrikaanse en Afrikaanse kultuur. Die teepot word die simbool van vooruitstrewendheid en kreatiwiteit. Dit is ’n kunswerk op sigself. Jak de Priester bring ’n uitstalling met 100 unieke teepotte na die fees wat die 100 jaar van Afrikaans vier. Dit sal die grootste en enigste teepot-uitstalling wees – eksklusief by Innibos. Elke teepot is uniek geskep deur die kreatiewe Jak de Priester wat self die kunswerke gedoen het. Hierdie besondere teepotte is te koop. Kom kies jou teepot uit die versameling en gryp die geleentheid aan om iets moois en kosbaar te kry wat jy vir nageslagte kan bewaar. Jou eie stukkie Afrikana. Meer Inligting Plek: Innibos Feesterrein – Bergvlam Hoërskool Restaurant Prys: Ingesluit in jou feesterrein toegangsfooie.

Keramiek bisque-verfwerkswinkel Aangebied deur Deirdre das Neves van Clay&Coffee. Kom verf you eie keramiek bisque koppies. Kies uit verskillende style en versier jou koppies met die borrelverf-tegniek. Jy kies jou eie kleur glasuursel. Vir besoekers van buite Mbombela is daar ʼn koerierdiens teen R100 om jou gebakte koppie weer by jou terug te besorg. Voltooiingstyd is ongeveer 6-8 weke. Slegs 10 plekke beskikbaar. Die eerste 5 plekke wat bespreek word se toegangskaartjie na die feesterrein is ingesluit. Bespreking word met betaling bevestig. Bespreek direk by Deirdre by 072 413 8162 voor 15 Junie 2025. Bespreek Nou Meer Inligting Plek: Innibos Feesterrein – T3 Hoërskool Bergvlam Prys: 2 koppies @ R500 of 1 koppie @ R300

Tekstuurblom kunswerkswinkel Aangebied deur Annelie Mans -The Creative Club Doen dit self! Skep jou eie tekstuur pasta verf en maak ʼn pragtige kunswerk vir jou huis. Kom leer die maklike en goedkoop resep sodat jy vir jouself na hartelus kunswerke kan skep. Slegs 10 plekke beskikbaar. Die eerste 5 plekke wat bespreek word se toegangskaartjie na die feesterrein is ingesluit. Bespreking word met betaling bevestig. Bespreek direk by Annelie by 082 958 3614 voor 15 Junie 2025. Bespreek Nou Meer Inligting Plek: Innibos Feesterrein – T3 Hoërskool Bergvlam Prys: R450

Hamerblomme-werkswinkel vir beginners Aangebied deur Annelie Mans -The Creative Club Om blomme met ‘n te hamer te slaan, is ʼn Japannese tegniek (Tatakizome) waardeur patrone op papier of materiaal geskep word deur vars blomme met ʼn hammer te slaan. Die papier en materiaal word vooraf met spesifieke chemikalieë behandel wat die langdurigheid van die patrone verseker. Die tegniek gaan op ʼn groot verskeidenheid materiale beoefen word: van papier tot egte linne en katoen. Elke persoon neem ten minste 7 stukke kuns huis toe. Slegs 10 plekke beskikbaar. Die eerste 5 plekke wat bespreek word se toegangskaartjie na die feesterrein is ingesluit. Bespreking word met betaling bevestig. Bespreek direk by Annelie by 082 958 3614 voor 15 Junie 2025. Bespreek Nou Meer Inligting Plek: Innibos Feesterrein – T3 Hoërskool Bergvlam Prys: R400

Kom kuier by BUCO Nelspruit se stalletjie Aangebied deur – BUCO Nelspruit Kom kuier by BUCO Nelspruit se stalletjie in klas T3. Daar word ʼn wye verskeidenheid kunsklasse aangebied, maar ook alles wat nodig is vir die kunsvlyt-liefhebber. Produkte wat die doen-dit-self-foendi sal verstom, sal te koop aangebied word: van Tork Craft-produkte en hars (resin) tot by mica-poeiers en kruitverf. Hierdie nuwe toevoeging tot die feesterrein bied ʼn groot verskeidenheid vir die ernstige kunsvlyter en stokperdjie-verslaafde. Die produkte gaan deurlopend gedemonstreer word. Bekwame personeel gaan feesgangers met raad en daad bystaan. Bring jou beursie saam en kom koop lekker! Produksie Inligting Plek: Innibos Feesterrein – T3 Hoërskool Bergvlam Prys: Ingesluit in jou feesterrein toegangsfooie.

Keramiek-werkswinkel: Maak jou eie bak of uitpakbord Aangebied deur – Zelmari van Schalkwyk van Kriate Ceramics & Experiences Kom sluit by ons aan vir ’n keramiek-werkswinkel waar jy jou eie unieke bak of item kan maak met die gebruik van ʼn verskeidenheid vorms. Jy kan een glasuurkleur kies en ons sal die stuk vir jou voltooi en in die oond bak. Vir feesgangers van elders is daar ʼn koerier-aflewering beskikbaar teen R100. Slegs 10 plekke beskikbaar. Die eerste 5 plekke wat bespreek word se toegangskaartjie na die feesterrein is ingesluit. Bespreking word met betaling bevestig. Bespreek direk by Zelmari by 073 138 7387 voor 15 Junie 2025. Bespreek Nou Produksie Inligting Plek: Innibos Feesterrein – T3 Hoërskool Bergvlam Prys: R500