Francois van Coke, die voorsanger van die omstrede rockgroep Fokofpolisiekar, vertel in hierdie biografie in sy eie stem aan Annie Klopper die gebeure wat hom oor die jare as mens en musikant gevorm het. Sy stories is by tye skreeusnaaks, ander kere verstommend, skokkend of indrukwekkend. Dit vermaak en ontroer.

Francois se perspektief op alles word gebied: van die Eisteddfodbeoordelaars wat hom op die ouderdom van ses ’n “streep” vir sy sang gegee het – nie eens eervolle vermelding nie – tot sy opgang in Fokofpolisiekar en Van Coke Kartel, sy deurbraak as solokunstenaar met die liedjie Toe vind ek jou en sy rol as afrigter op The Voice. Minder bekende en onbekende verhale word ook vertel oor wilde partytjies en vuisgevegte, bedwelmde aande, desperate dae, nagte in tronkselle, detoks en soberheid. Daar is ook sy groot liefde, Lauren, en die geboorte van sy kinders wat sy lewe verander het. Dít is sy stories, hoe hý dit onthou.

Annie Klopper is ʼn skrywer, taalpraktisyn en oud-musiekjoernalis. In 2011 het sy Biografie van ʼn Bende oor die rockgroep Fokofpolisiekar vrygestel. Daarna het sy ʼn doktorale studie oor Afrikaanse rap-musiek voltooi. Haar gedigte verskyn in verskeie publikasies. Haar roman, Die tragiese saak van Pamina Vermaak, is in ’n fliek omskep.