Maklik met Marinda bevat nostalgiese huiskos, sonder fieterjasies of vreemde bestanddele wat jy in ’n japtrap kan berei. Al die immergroen gunstelinge vir skaap- en beesvleis, hoender, vis, vark, brood, rys, randrekkerpastas, sappige bykosse, soettandgenot en gebottelde slaaie, souse en konfyte is daar. Die staatmakerresepte is in doodeenvoudige stappe vir elke kosliefhebber, vir elke dag se gebruik.

Marinda is ’n voorslag in die kombuis en hou nie van vaal kos nie, selfs afval moet met ’n bietjie kleur voorgesit word. Sy was die aanbieder van die gewilde kosprogramme Maklik met Marinda en Laat die potte prut op VIA, DStv-kanaal 147. Dit is haar vierde kookboek dié.