Moet Weet

Toneel: Drama-komedie Naam van produksie: Mirakel Met Dawid Minnaar, Bettie Kemp, Rolanda Marais, Edwin van der Walt, Carla Smith en Eben Genis Teks: Reza de Wet Regie en ontwerp: Marthinus Basson Verhoogbestuurder en beligtingsontwerp: Nicolaas de Jongh Assistent-verhoogbestuurder: Philip Theron Gradering: Geen o/12 (Vooroordeel, Diviniteit) Datum en tyd: Do 29 Jun 11:00; Vr 30 Jun 18:00; Sa 1 Jul 10:00 Venue: Mbombela Stadsteater Tydsduur: 130 min (pouse ingesluit) Prys: R190 Vervaardiger: KKNK ’n Feesteforum-produksie, moontlik gemaak deur NATi Dis 1938. Met die Depressie sukkel mense om te oorleef. ’n Teatergeselskap onder die leiding van die befaamde akteur Dante du Pré bevind hulle in ’n klein dorpie in die hoop om ’n bietjie verligting te bring met ’n opvoering en sodoende die baie leë geldkoffer weer ’n bietjie aan te vul. Maar een van die spelers, die jong Abel, kom oorspronklik van die dorp en is steeds getroud met die stinkryk en heelwat ouer, Anna. Maar sy liewe Lenie verwag nou sy kind. Dan daag Anna op met ’n mandjie vol kos en die verhongerde geselskap moet begin kies tussen oorlewing en verraad, idealisme en realiteit. Hierdie bittersoet komedie uit die pen van die magiese Reza de Wet is nog steeds net so vars en in gesprek met ons huidige realiteit ná Covid-19 en ’n steeds tuimelende ekonomie.  

Toneel: Drama Naam van produksie: Kamphoer – die verhaal van Susan Nell Met Sandra Prinsloo Teks: Cecilia du Toit, Sandra Prinsloo en Lara Foot Gegrond op die topverkoper en debuutroman Kamphoer deur Francois Smit en die niefiksie-publikasie The Boer Whore deur Nico Moolman Regie: Lara Foot Stel- en beligtingsontwerp: Patrick Curtis Klankontwerp, klankbaan en komposisie: Simon Kohler Kostuumontwerp: Mariechen Vosloo en Birrie le Roux Verhoogbestuurder: Jeanne Steenkamp Vervaardig deur Theatrerocket Moontlik gemaak deur KunsStig Gradering: Geen o/14 (Taal) Datum en tyd: Do 29 Jun 18:00; Vr 30 Jun 11:00; Sa 1 Jul 10:00 Venue: Nelspruit Hoërskool Ouditorium Tydsduur: 75 minute Prys: R180 Gegrond op ʼn ongelooflike verhaal, vertolk Suid-Afrikaanse legende Sandra Prinsloo die uitdagende rol van Susan Nell wat gedurende die Anglo-Boereoorlog (1899–1902) in ʼn konsentrasiekamp beland waar sy deur twee Britse offisiere en ’n joiner wreedaardig verkrag en vir dood agtergelaat word. Sy oorleef die gruweldaad en reis gedurende die Eerste Wêreldoorlog na ʼn psigiatriese hospitaal in Engeland waar haar paaie kruis met een van haar verkragters, waar hy as pasiënt aan bomskok ly. Met dié herontmoeting word Susan opnuut gekonfronteer met die pyn en vernedering van haar verlede. Beeld skryf: “Sandra Prinsloo speel dié rol met oorgawe.” Stronk beskryf dit as “’n kragtige drama wat diep tref” en “Prinsloo se kragtoer as Susan Nell het die gehoor verdwaas gelaat. Trane het in baie oë geblink ná ’n staande ovasie.” Jan-Jan Joubert skryf in sy resensie vir Maroela Media: “Dit is meesleurend. Beter teater gaan jy nie sommer kry nie, en as jy dit misloop, is dit onontkenbaar jou verlies”. Dié kragtige drama het talle toekennings ingeryg na vyfster-resensies en uitverkoopte vertonings. Hierdie pragstuk is bekroon met ʼn kykNET Fiësta-toekenning en ʼn Naledi-prys vir die beste spel in ʼn solovertoning. Die produksie is benoem vir Fiësta-, Fleur du Cap-, Aardklop- en Naledi-pryse. Kamphoer was die topverkoper by verskeie feeste en hierdie pragproduksie is nou hier in die Laeveld te sien. Foto’s deur Jesse Kramer:

Toneel: Komedie Naam van produksie: Hans gee Herklaas horings Met Tobie Cronjé Debuut: Ja Teks: Rudie van Rensburg Gradering: Gesin Datum en tyd: Vr 30 Jun 10:00; Sa 1 Jul 14:00 Venue: Bergland Laerskool Tydsduur: 70 min Prys: R180 Ondersteun deur Innibos Debuut RSG luisteraars het vasgenael voor die radio gesit en luister hoe Tobie Cronje lewe gee aan Rudie van Rensburg se karakters in die Hans-boeke. Binnekort speel hy ook in die rolprentweergawe van Hans steek die Rubicon oor. Nou kry Innibos gehore die eerste unieke geleentheid om Tobie lewendig op die verhoog te ervaar in ʼn dramatiese voorlesing en verwerking van Hans gee vir Herkaas horings.  Hans, verlosser van die inwoners van Huis Madeliefie, is die oplosser van al hulle klagtes. As beheerraadlid is hy verantwoordelik om alle klein probleempies op te los – met gans te min geld in die kitty. As Fasie hom dus nooi vir ʼn vakansietjie op Hermanus, is Hans maar te gretig om sy Safari-pakke te pak. Daar kom hy in aanraking met Grond Graaffwater (Overstrand se rykste skobbejak) wat sy enorme hotel op Herklaas se grond wil bou. Hans gee Herklaas horings ʼn topverkoper-boek uit die pen van Rudie van Rensburg beloof om teatergangers te laat kraai van die lag. Kom beleef die legendariese Tobie Cronjé in al hierdie karakters wanneer hy deur dramatiese voorlesing aan hierdie karakters lewe gee. Die trapsitplekrye by Bergland Laerskool is met trots geborg deur Mpumalanga Scaffolding.

 Innibos se toneelprogram gaan iets vir ʼn ieder en ʼn elk bied. Op die toneelfront is daar van ernstige dramas tot skreeusnaakse komedies. Een van die hoogtepunte wat aangebied gaan word, is Mirakel met Dawid Minnaar, Brümilda van Rensburg, Rolanda Marais, Edwin van der Walt, Eben Genis en Carla Smith. Hierdie drama behoort elke teaterganger se hart te raak. In Kamphoer – die verhaal van Susan Nel  is Sandra Prinsloo in die naamrol. Hierdie is ‘n kragtoer wat nie misgeloop mag word nie en  beloof om die hartsnare te raak. Kom lag saam met Hans steek die Rubicon oor en Hans gee Herklaas horings met Charlie Bouguenon in die hoofrol. Hans se manewales sal almal laat skater. Dan is Desiré Gardner as Magda Louw nou op almal se lippe met die gelyknamige gewilde televisieprogram – ʼn eenvrou-komedie op sy beste! Die immergewilde Laerskool Noord met Margit Meyer Rödenbeck, Marion Holm, Ilne Fourie en Neels Coetzee is ook op die planke. Dit gee ‘n kykie na wat in ‘n skool se personeelkamer aangaan. Die regie is deur Gideon Lombard. Natuurlik is die gewilde My vrou se man se vrou ook op die spyskaart. Met Phillru van Achterbergh, Botha Enslin, Marissa Claasen, Danielle Britz, Stefan Vermaak, Thiart Li en Etienne du Plessis beloof hierdie vermaak uit die boonste rakke. Frank Opperman is hier in ʼn splinternuwe stuk wat deur Dana Snyman geskryf is. Hou hierdie spasie dop vir verdere inligting oor die program.