Boekenaweek 2023

Gert Vlok Nel, wat geen vreemdeling in die Laeveld is nie, se vertoning is ingelei deur Lieke Joosen, ‘n Nederlandse sangeres wat ‘n onhutsend mooi weergawe van die tradisionele Afrikaanse lied ‘n Handvol gruis uit die Hantam gelewer het. Dit was die hoogtepunt van die aandvertoning.

Johan Myburg, ontvanger van die Hertzogprys vir sy digbundel Narreskip in 2020, en Tom Dreyer as debuutdigter met Nou in infrarooi, het mekaar in ’n “digter”-gesprek van naderby leer ken. Hoewel dit die twee digters se eerste ontmoeting was, was daar ’n heerlike woord en wederwoord, sowel as voorlesings van hul onderskeie gedigte. Die gehoor is meegesleur, en die spontane applous ‘n pluimpie vir die digters.

Tweemalige Hertzogpryswenner SJ Naudé het met Annemarie van der Walt gesels oor Van Vaders en vlugtelinge, sy vierde gepubliseerde werk. Die verskillende vorme en ook tekortkominge in vaderskap het onder meer onder die loep gekom, terwyl Naudé ook meer vertel het van die aanslag waarmee hy die skryf van die boek aangepak het.

Carina Stander, skepper van die fantasie soos vertel in die Bergengel-trilogie, het die lesers vertel van haar gedagtewêreld. Sy het ook van haar besondere visuele kunswerke uitgestal.

Die Laeveldse praatdigter Menzi Mkhonza van Words in my Mouth Poetry Slam het oor die middaguur van sy gedigte voorgedra, waarna Susan Booyens (wat onlangs op Wie word ’n miljoenêr met R500 000 weggestap het) die boeklesers laat kopkrap het in ’n Lit-quizz.

Kaapsehoopse skrywer Alita Steenkamp se eerste Jeugverhaal Deur die vuur onderstreep haar veelsydigheid om uiteenlopende onderwerpe boeiend aan te bied. Skrywer van biografieë van onder andere Hestrie Cloete, Wynie Strydom, Mathys Roets en Stefaans Coetzee, is sy ook ‘n gesoute vryskytjoernalis wat al in talle tydskrifte gepubliseer het. Sy het verklap dat kinderrympies deesdae haar ink laat kook nadat iemand haar daarop gewys het hoe min sinvolle kinderryme met ‘n meer moderne aanslag daar is.

Saterdagoggend het op ’n redelike gewigtige noot begin met die gesprek tussen Susan Booyens en joernalis en skrywer Deon Lampbrecht oor sy bydrae in die boek Diensplig – hoekom stotter ons pa’s so (saamgestel deur Anelia Heese). Die verpligte weermagdiens van destyds is ’n teer punt wat dekades later steeds uitkring, ook vir die families van destyds se dienspligtiges.

Die aand is afgesluit met Die Filosofiekafee en digter Charl-Pierre Naudé wat die oop gesprek ingelei het met die tema Die kusntenaar en die skrywer se verhouding met die gode.

Tony Park, Australiese skrywer wat ná sowat 25 jaar as ‘n Laevelder beskou word, het ‘n baie vermaaklike en ligte blik gegee op die skrywers-amp, en wat presies daartoe gelei het dat hy sy hart in Afrika verloor het, asook waarom hy dit verkies om, met die spanningsroman as medium, aktuele kwessies aan te spreek. Vendetta, sy nuutste boek, gebruik juis die Bosoorlog van merendeels die 1980’s, as agtergrond.